ਰੌਂਦਾ ਪੰਜਾਬ
ਪੰਜਾਬ ਚ ਬੈਠੇ ਨੇਤਾ ਠੱਗ ,
ਚਿੱਟੇ ਕੱਪੜੇ ਦਾਗੀ ਪੱਗ ।
ਪੁਲਿਸ ਵੀ ਹੋਗੀ ਬੁੱਚੜ ਬਾਹਲੀ
ਵੱਡੇ ਢਿੱਡ ਤੇ ਦਾਹੜੀ ਕਾਲੀ ।
ਸੁਮੇਧ ਸੈਣੀ ਜਿਹੇ ਖ਼ੂਨੀ ਗੁੰਡੇ,
ਜਿਹਨੇ ਮਾਰੇ ਫੜ ਫੜ ਮੁੰਡੇ ।
ਪਰਦੀਪ ਵਿਰਕ ਵਕੀਲ ਹੈ ਜਿਹੜਾ,
ਦੇਊਗਾ ਇਹਨੂੰ ਪੁੱਠਾ ਗੇੜਾ ।
ਸੁੱਚੇ ਬੇਲੀ ਨੇ ਸ਼ਰਮ ਹੀ ਲਾਹਤੀ,
ਲੋਕਾਂ ਵੀਡੀਓ ਟਿਊਬ ਤੇ ਪਾਤੀ ।
ਹੁਣ ਨੀ ਜਾਣਾ ਦੁੱਧ ਨਾਲ ਧੋਤਾ ,
ਭੁਗਤੂ ਗਾ ਹੁਣ ਪੁੱਤ ਤੇ ਪੋਤਾ ।
ਪੰਜਾਬ ਨਸ਼ੇ ਦੇ ਵਿੱਚ ਰੋੜਿਆ,
ਨੌਜਵਾਨੀ ਦਾ ਲੱਕ ਤੋੜਿਆ ।
ਨੌਕਰਸ਼ਾਹੀ ਹੈ ਚਿੱਟਾ ਹਾਥੀ ,
ਅਫਸਰ ਨੇਤਾ ਨੇ ਪੱਕੇ ਸਾਥੀ।
ਕੁਰਸੀ ਰੱਖਣ ਵਿੱਚੇ ਘਰਦੇ,
ਮੁੰਡੇ ਪੋਤੇ ਚੌਣਾਂ ਲੜਦੇ ।
ਵਾਅਦੇ ਕਰਦੇ ਮੀਟਰ ਲੰਮੇ
ਬਾਦਲ ਸਾਰੇ ਲੀਡਰ ਜੰਮੇਂ।
ਅਫਸਰਸ਼ਾਹੀ ਦਾ ਜ਼ੋਰ ਚੱਲੇ
ਟੱਬਰ ਸੌਂਦੇ ਏ ਸੀ ਥੱਲੇ ।
ਮਜਦੂਰ ਸਾਰੇ ਭੁੱਖੇ ਸੌਂਣ ,
ਨੇਤਾ ਲੱਗੇ ਭਾਰ ਘਟਾਉਣ।
ਕਿਸਾਨ ਯੂਨੀਅਨ ਚੀਕਾਂ ਮਾਰੇ,
ਚੰਗੇ ਬੰਦੇ ਜੇਲੀਂ ਤਾੜੇ
ਅੱਜ ਵੀ ਭੈੜੀ ਜੱਟ ਦੀ ਜੂਨ ,
ਨਾਲ ਪਸੀਨੇ ਚੌਂਦਾ ਖੂਨ ।
ਹੱਥੀਂ ਕਿਰਤ ਰੁਲਦੀ ਜਾਵੇ,
ਕਰਜੇ ਦੀ ਪੰਡ ਡੁੱਲਦੀ ਜਾਵੇ।
ਕਾਨੂੰਨ ਦਾ ਹੋਵੇ ਨਿੱਤੇ ਘਾਣ ।
ਕੈਪਟਨ ਸੌਂਦਾ ਲੰਬੀਆਂ ਤਾਣ ।
ਨੇਤਾ ਜੀ ਨੇ ਬੜੇ ਬੇਸ਼ਰਮ ,
ਭਾਸ਼ਣ ਦੇਣੇ ਆਉਂਦੇ ਗਰਮ।
ਚੀਨ ਡਰਾਵੇ ਮੁਸ਼ਕਿਲ ਘੜੀਆਂ,
ਨੇਤਾ ਜੀ ਦੀਆਂ ਮੁੱਛਾਂ ਖੜੀਆਂ।
ਲੀਡਰ ਲੜਦੇ ਕੁੱਕੜਾਂ ਵਾਗਾਂ,
ਪੁਲਿਸ ਵਾਲੇ ਨਾਲ ਕੁੱਟਣ ਡਾਂਗਾ।
ਰੌਂਦਾ ਪੰਜਾਬ ਸੁਣ ਝੂਠੇ ਨਾਅਰੇ ,
ਸ਼ੇਰੇ ਪੰਜਾਬ ਨੂੰ ਹਾਕਾਂ ਮਾਰੇ ।
ਦੀਪ ਵੀ ਲਾ ਕੇ ਬੈਠੀ ਆਸ ,
ਮੰਤਰੀ ਕੋਈ ਆਊ ਖਾਸ ।
ਟੱਬਰਵਾਦ ਫਿਰ ਹੋਣ ਗਏ ਬੰਦ,
ਚੁੱਕਿਆ ਜਾਣਾ ਫੇਰ ਦੇਸ਼ ਦਾ ਗੰਦ।
ਮਨਦੀਪ ਕੌਰ ਭੰਡਾਲ
ਲੰਡਨ ਤੋਂ
